ਲੁਧਿਆਣਾ : ਹੋਲਸੇਲ ਕਾਸਮੈਟਿਕ ਬਾਜ਼ਾਰਾਂ 'ਚ ਕੁਝ ਅਜਿਹੇ ਦੁਕਾਨਦਾਰ ਹਨ ਜੋ ਅਸਲ 'ਚ ਦੇਸ਼ ਦੀਆਂ ਮਸ਼ਹੂਰ ਕੰਪਨੀਆਂ ਦੇ ਕਾਸਮੈਟਿਕ ਉਤਪਾਦਾਂ ਦੀ ਨਕਲ ਕਰ ਕੇ ਵੇਚ ਰਹੇ ਹਨ। ਇਸ ਮਾਮਲੇ ਨੂੰ ਲੈ ਕੇ ਅੱਜ ਬਾਅਦ ਦੁਪਹਿਰ ਦੇਸ਼ ਦੀ ਨਾਮਵਰ ਕਾਸਮੈਟਿਕ ਕੰਪਨੀ ਦੀ ਟੀਮ ਨੇ ਆਪਣੇ ਕਾਨੂੰਨੀ ਸਲਾਹਕਾਰ ਅਤੇ ਸਥਾਨਕ ਪੁਲਿਸ ਨਾਲ ਮਿਲ ਕੇ ਤਾਲਾਬ ਮੰਦਿਰ ਰੋਡ, ਸਾਬਣ ਮੰਡੀ ਨੇੜੇ ਚੰਗੀ ਮੰਡੀ ਵਿੱਚ ਕਾਸਮੈਟਿਕ ਦਾ ਕਾਰੋਬਾਰ ਕਰ ਰਹੇ ਇੱਕ ਦੁਕਾਨਦਾਰ ਦੇ ਗੋਦਾਮ ਵਿੱਚ ਛਾਪਾ ਮਾਰਿਆ। ਟੀਮ ਦੇ ਅਧਿਕਾਰੀਆਂ ਨੇ ਗੋਦਾਮ ਵਿੱਚ ਪਏ ਕਈ ਕਾਰਟੂਨਾਂ ਦੀ ਤਲਾਸ਼ੀ ਲਈ ਅਤੇ ਉਨ੍ਹਾਂ ਦੀ ਸੂਚੀ ਬਣਾ ਕੇ ਆਪਣੇ ਨਾਲ ਲੈ ਗਏ।
ਇਸ ਛਾਪੇਮਾਰੀ ਕਾਰਨ ਗੁੜ ਮੰਡੀ, ਮਿੰਨੀ ਗੁੜ ਮੰਡੀ, ਤਾਲਾਬ ਮੰਦਿਰ ਰੋਡ, ਬਾਗ ਵਾਲੀ ਗਲੀ, ਤੇਲੀਆ ਗਲੀ, ਮੀਨਾ ਬਜ਼ਾਰ ਅਤੇ ਹੋਰ ਇਲਾਕਿਆਂ ਵਿੱਚ ਥੋਕ ਕਾਸਮੈਟਿਕ ਦਾ ਕਾਰੋਬਾਰ ਕਰਨ ਵਾਲੇ ਵਪਾਰੀਆਂ ਵਿੱਚ ਹੜਕੰਪ ਮੱਚ ਗਿਆ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਕੁਝ ਅਜਿਹੇ ਥੋਕ ਦੁਕਾਨਦਾਰ ਹਨ ਜੋ ਕਾਸਮੈਟਿਕ ਉਤਪਾਦ ਬਣਾਉਣ ਵਾਲੀਆਂ ਵੱਡੀਆਂ ਕੰਪਨੀਆਂ ਦੇ ਉਤਪਾਦਾਂ ਦੀ ਨਕਲ ਕਰਕੇ ਉਨ੍ਹਾਂ ਨੂੰ ਅਸਲ ਕੀਮਤ 'ਤੇ ਵੇਚ ਕੇ ਕਥਿਤ ਤੌਰ 'ਤੇ ਮੋਟੀ ਕਮਾਈ ਕਰ ਰਹੇ ਹਨ।
