ਲੁਧਿਆਣਾ: ਮਹਾਨਗਰ ਦੇ ਕਾਰੋਬਾਰੀਆਂ 'ਤੇ ਇਨਕਮ ਟੈਕਸ ਵਿਭਾਗ ਦੀ ਛਾਪੇਮਾਰੀ ਖਤਮ, ਜਾਣੋ ਕੀ ਹੋਇਆ ਬਰਾਮਦ

ਲੁਧਿਆਣਾ : ਇਨਕਮ ਟੈਕਸ ਵਿਭਾਗ ਦੇ ਇਨਵੈਸਟੀਗੇਸ਼ਨ ਵਿੰਗ ਨੇ ਲੁਧਿਆਣਾ 'ਚ 3 ਤੋਂ 4 ਅਹਾਤਿਆਂ 'ਤੇ ਫਰਜ਼ੀ ਐਂਟਰੀ ਦੇਣ ਵਾਲੇ ਕੇਸਾਂ 'ਤੇ ਛਾਪੇਮਾਰੀ ਕਰਕੇ ਬੀਤੇ 3 ਦਿਨਾਂ ਤੋਂ ਚੱਲ ਰਹੀ ਕਾਰਵਾਈ ਨੂੰ ਐਤਵਾਰ ਸਵੇਰੇ ਖਤਮ ਕਰ ਦਿੱਤਾ। ਵਿਭਾਗੀ ਸੂਤਰਾਂ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਵਿਭਾਗ ਨੇ ਤਲਾਸ਼ੀ ਦੌਰਾਨ ਵੱਡੀ ਮਾਤਰਾ ਵਿੱਚ ਜਾਅਲੀ ਦਸਤਾਵੇਜ਼, ਨਕਦੀ, ਗਹਿਣੇ, ਜਾਅਲੀ ਫਰਮਾਂ ਦੇ ਦਸਤਾਵੇਜ਼ ਅਤੇ ਕੈਸ਼ ਐਂਟਰੀ ਸਬੰਧੀ ਦਸਤਾਵੇਜ਼ ਬਰਾਮਦ ਕੀਤੇ ਹਨ। ਦੱਸ ਦਈਏ ਕਿ ਇਹ ਛਾਪੇਮਾਰੀ ਮਾਰਚ ਮਹੀਨੇ 'ਚ ਐਂਟਰੀ ਪ੍ਰੋਵਾਈਡਰਾਂ 'ਤੇ ਕੀਤੀ ਗਈ ਛਾਪੇਮਾਰੀ ਦੇ ਸੰਦਰਭ 'ਚ ਹੋਈ ਹੈ, ਜਿਸ 'ਚ ਵਿਭਾਗ ਨੇ ਜਾਅਲੀ ਐਂਟਰੀ ਦੇਣ ਵਾਲਿਆਂ ਦਾ ਗਠਜੋੜ ਫੜਿਆ ਸੀ। 

ਇਹ ਵੀ ਪੜ੍ਹੋ-  ਪੰਜਾਬ 'ਚ ਚੱਲਦੀ ਰੇਲਗੱਡੀ ਤੋਂ ਵੱਖ ਹੋਇਆ ਇੰਜਣ, ਹਜ਼ਾਰਾਂ ਯਾਤਰੀਆਂ ਦੀ ਜਾਨ ਦਾਅ 'ਤੇ (ਵੀਡੀਓ)

ਇਹ ਐਂਟਰੀ ਪ੍ਰੋਵਾਈਡਰ ਆਪਣਾ ਕਮਿਸ਼ਨ ਰੱਖ ਕੇ ਫਰਮਾਂ ਨੂੰ ਫਰਜ਼ੀ ਐਂਟਰੀਆਂ ਦਿੰਦੇ ਹਨ। ਉਦਾਹਰਨ ਲਈ, ਜੇਕਰ ਕੋਈ ਫਰਮ 100 ਰੁਪਏ ਦੀ ਐਂਟਰੀ ਚਾਹੁੰਦੀ ਹੈ, ਤਾਂ ਉਕਤ ਐਂਟਰੀ ਪ੍ਰਦਾਤਾ ਆਪਣਾ 2 ਫੀਸਦੀ ਕਮਿਸ਼ਨ ਰੱਖਣ ਤੋਂ ਬਾਅਦ ਐਂਟਰੀ ਦਿਖਾਉਂਦਾ ਹੈ ਅਤੇ ਫਰਮ ਨੂੰ 98 ਰੁਪਏ ਵਾਪਸ ਕਰਦਾ ਹੈ। ਵਿਭਾਗ ਵੱਲੋਂ ਨੈੱਟਵਰਕ ਨੂੰ ਅੱਗੇ ਜੋੜ ਕੇ ਕਾਰਵਾਈ ਕੀਤੀ ਜਾ ਰਹੀ ਹੈ। ਸੁਣਨ ਵਿਚ ਆਈਆਂ ਗੱਲਾਂ ਅਨੁਸਾਰ ਮੰਡੀ ਗੋਬਿੰਦਗੜ੍ਹ ਅਤੇ ਲੁਧਿਆਣਾ ਦੇ ਕਈ ਵੱਡੇ ਕਾਰੋਬਾਰੀਆਂ ਵਿਰੁੱਧ ਜਲਦੀ ਹੀ ਕਾਰਵਾਈ ਹੋ ਸਕਦੀ ਹੈ।