ਕੋਠੀ ਦੀ ਮੁਰੰਮਤ ਦੇ ਬਹਾਨੇ ਆਰਕੀਟੈਕਟ ਨਾਲ ਸ਼ਰਮਨਾਕ ਕਾਰਾ,

ਸਮਾਣਾ : ਸਿਟੀ ਪੁਲਿਸ ਨੇ ਆਰਕੀਟੈਕਟ ਨਾਲ ਕੁੱਟਮਾਰ ਕਰਨ ਅਤੇ ਉਸ ਨੂੰ ਧਮਕਾ ਕੇ ਉਸ ਦਾ ਪਰਸ ਅਤੇ ਹੋਰ ਸਾਮਾਨ ਖੋਹਣ ਅਤੇ ਵੀਡੀਓ ਬਣਾ ਕੇ ਪੈਸੇ ਵਸੂਲਣ ਦੇ ਦੋਸ਼ 'ਚ ਹਰਵਿੰਦਰ ਸਿੰਘ ਵਾਸੀ ਭਿੰਡਰ ਕਲੋਨੀ, ਸਮਾਣਾ ਸਮੇਤ ਚਾਰ ਵਿਅਕਤੀਆਂ ਖਿਲਾਫ ਮਾਮਲਾ ਦਰਜ ਕੀਤਾ ਹੈ। ਮਾਮਲੇ ਦੇ ਜਾਂਚ ਅਧਿਕਾਰੀ ਸਿਟੀ ਪੁਲਿਸ ਦੇ ਏਐਸਆਈ ਪੂਰਨ ਸਿੰਘ ਨੇ ਦੱਸਿਆ ਕਿ ਚੰਦ ਗੋਇਲ ਵਾਸੀ 7 ਸਿਟੀ ਕਲੋਨੀ ਸਮਾਣਾ ਵੱਲੋਂ ਪੁਲਿਸ ਨੂੰ ਦਰਜ ਕਰਵਾਈ ਸ਼ਿਕਾਇਤ ਅਨੁਸਾਰ ਕਿਸੇ ਅਣਪਛਾਤੇ ਵਿਅਕਤੀ ਨੇ ਉਸ ਨੂੰ ਕੋਠੀ ਦੀ ਮੁਰੰਮਤ ਦੇ ਬਹਾਨੇ ਭਾਖੜਾ ਨਹਿਰ 'ਤੇ ਬੁਲਾਇਆ ਅਤੇ ਉਸ ਨੂੰ ਕੋਠੀ ਦਾ ਕੰਮ ਦਿਖਾਉਣ ਦੇ ਬਹਾਨੇ ਭਿੰਡਰ ਕਲੋਨੀ, ਸਮਾਣਾ ਦੇ ਇੱਕ ਘਰ ਵਿੱਚ ਲੈ ਗਿਆ। ਜਿੱਥੇ ਉਸ ਨੇ ਆਪਣੇ ਹੋਰ ਸਾਥੀਆਂ ਨਾਲ ਮਿਲ ਕੇ ਉਸ 'ਤੇ ਹਮਲਾ ਕੀਤਾ ਅਤੇ ਧਮਕੀਆਂ ਦਿੱਤੀਆਂ ਅਤੇ ਉਸ ਦਾ ਪਰਸ, ਮੋਬਾਈਲ, ਕਾਰ ਦੀਆਂ ਚਾਬੀਆਂ ਖੋਹ ਲਈਆਂ। ਉਸ ਦੇ ਕੱਪੜੇ ਉਤਾਰ ਦਿੱਤੇ ਗਏ ਅਤੇ ਵੀਡੀਓ ਬਣਾ ਕੇ ਵਾਇਰਲ ਕਰਨ ਦੀ ਧਮਕੀ ਦੇ ਕੇ ਪੈਸੇ ਦੀ ਮੰਗ ਕੀਤੀ ਗਈ। ਉਸ ਨੇ ਆਪਣੇ ਦੋਸਤ ਤੋਂ ਗੂਗਲ ਪੇਅ ਰਾਹੀਂ 20,000 ਰੁਪਏ ਮੰਗੇ ਅਤੇ ਉਸ ਨੂੰ ਦੇ ਦਿੱਤੇ। ਦੋਸ਼ੀ ਨੇ ਉਸ ਨੂੰ ਚੇਤਾਵਨੀ ਵੀ ਦਿੱਤੀ ਕਿ ਜੇ ਉਸਨੇ ਕਿਸੇ ਨੂੰ ਜਾਣਕਾਰੀ ਦਿੱਤੀ ਤਾਂ ਗੰਭੀਰ ਨਤੀਜੇ ਭੁਗਤਣੇ ਪੈਣਗੇ। ਅਧਿਕਾਰੀ ਨੇ ਦੱਸਿਆ ਕਿ ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਦੋਸ਼ੀ ਫਰਾਰ ਹੈ।