ਚੰਡੀਗੜ੍ਹ/ਮੋਹਾਲੀ : ਪੰਜਾਬ ਸਰਕਾਰ ਨੇ ਸੂਬੇ ਦੇ ਨੌਜਵਾਨਾਂ ਅਤੇ ਆਰਥਿਕਤਾ ਲਈ ਇੱਕ ਨਵਾਂ ਸੁਨਹਿਰੀ ਅਧਿਆਏ ਲਿਖਿਆ ਹੈ। ਭਾਰਤ ਦੀ ਮੋਹਰੀ ਆਈ.ਟੀ. ਕੰਪਨੀ ਇਨਫੋਸਿਸ ਲਿਮਟਿਡ ਮੋਹਾਲੀ ਦੇ ਆਈ.ਟੀ. ਸਿਟੀ ਵਿੱਚ 300 ਕਰੋੜ ਰੁਪਏ ਦਾ ਵੱਡਾ ਨਿਵੇਸ਼ ਕਰਨ ਜਾ ਰਹੀ ਹੈ। ਇਸ ਨਾਲ 30 ਏਕੜ ਵਿੱਚ ਇੱਕ ਅਤਿ-ਆਧੁਨਿਕ ਕੈਂਪਸ ਬਣੇਗਾ, ਜੋ 2,500 ਤੋਂ ਵੱਧ ਉੱਚ-ਗੁਣਵੱਤਾ ਵਾਲੀਆਂ ਤਕਨੀਕੀ ਨੌਕਰੀਆਂ ਪੈਦਾ ਕਰੇਗਾ।
ਇਹ ਪ੍ਰੋਜੈਕਟ ਸਰਕਾਰ ਦੀ 'ਮਿਸ਼ਨ ਇਨਵੈਸਟਮੈਂਟ' ਪਹਿਲਕਦਮੀ ਦੀ ਇੱਕ ਸ਼ਾਨਦਾਰ ਉਦਾਹਰਨ ਹੈ, ਜਿਸ ਨਾਲ ਪੰਜਾਬ ਉੱਤਰੀ ਭਾਰਤ ਦਾ ਪ੍ਰਮੁੱਖ ਆਈ.ਟੀ. ਹੱਬ ਬਣਨ ਦੀ ਦਿਸ਼ਾ ਵਿੱਚ ਇੱਕ ਮੀਲ ਪੱਥਰ ਸਾਬਤ ਹੋਵੇਗਾ।
ਰੁਜ਼ਗਾਰ ਦੇ ਵੱਡੇ ਮੌਕੇ: ਪ੍ਰੋਜੈਕਟ ਦੋ ਪੜਾਵਾਂ ਵਿੱਚ ਹੋਵੇਗਾ ਪੂਰਾ
ਮੋਹਾਲੀ ਦੇ ਆਈ.ਟੀ. ਸਿਟੀ ਵਿੱਚ ਬਣਨ ਵਾਲਾ ਇਹ ਇਨਫੋਸਿਸ ਕੈਂਪਸ ਅਤਿ-ਆਧੁਨਿਕ ਤਕਨੀਕਾਂ ਜਿਵੇਂ ਕਿ ਸਾਫਟਵੇਅਰ ਡਿਵੈਲਪਮੈਂਟ, ਡਾਟਾ ਐਨਾਲਿਟਿਕਸ, ਅਤੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਦਾ ਕੇਂਦਰ ਹੋਵੇਗਾ।
ਪ੍ਰੋਜੈਕਟ ਦੋ ਪੜਾਵਾਂ ਵਿੱਚ ਪੂਰਾ ਹੋਵੇਗਾ:
- ਪੜਾਅ 1: 3 ਲੱਖ ਵਰਗ ਫੁੱਟ ਦਾ ਨਿਰਮਾਣ, ਜਿਸ ਨਾਲ ਤੁਰੰਤ ਰੁਜ਼ਗਾਰ ਦੇ ਮੌਕੇ ਖੁੱਲ੍ਹਣਗੇ।
- ਪੜਾਅ 2: 4.8 ਲੱਖ ਵਰਗ ਫੁੱਟ ਦਾ ਹੋਰ ਵਿਸਥਾਰ, ਜਿਸ ਨਾਲ ਕੁੱਲ ਮਿਲਾ ਕੇ 2,500 ਤੋਂ 2,700 ਨੌਕਰੀਆਂ ਪੈਦਾ ਹੋਣਗੀਆਂ।
ਸਥਾਨਕ ਨੌਜਵਾਨਾਂ ਨੂੰ ਤਰਜੀਹ, 'ਬ੍ਰੇਨ ਡਰੇਨ' ਨੂੰ ਲੱਗੇਗੀ ਠੱਲ੍ਹ
ਇਨਫੋਸਿਸ ਨੇ ਸਪੱਸ਼ਟ ਕੀਤਾ ਹੈ ਕਿ ਇਸ ਕੈਂਪਸ ਵਿੱਚ ਪੰਜਾਬ ਦੇ ਸਥਾਨਕ ਨੌਜਵਾਨਾਂ ਨੂੰ ਤਰਜੀਹ ਦਿੱਤੀ ਜਾਵੇਗੀ। ਕੰਪਨੀ ਪੰਜਾਬ ਦੇ ਕਾਲਜਾਂ ਨਾਲ ਮਿਲ ਕੇ ਸਿਖਲਾਈ ਅਤੇ ਹੁਨਰ ਵਿਕਾਸ ਪ੍ਰੋਗਰਾਮ ਚਲਾਏਗੀ। ਇਹ ਉਪਰਾਲਾ ਨਾ ਸਿਰਫ 'ਬ੍ਰੇਨ ਡਰੇਨ' ਨੂੰ ਰੋਕੇਗਾ, ਬਲਕਿ ਨੌਜਵਾਨਾਂ ਨੂੰ ਆਪਣੇ ਹੀ ਸੂਬੇ ਵਿੱਚ ਉੱਜਵਲ ਭਵਿੱਖ ਬਣਾਉਣ ਦਾ ਮੌਕਾ ਦੇਵੇਗਾ।
ਇਸ ਨਿਵੇਸ਼ ਨਾਲ ਮੋਹਾਲੀ ਦੀ ਸਥਾਨਕ ਆਰਥਿਕਤਾ ਨੂੰ ਨਵੀਂ ਊਰਜਾ ਮਿਲੇਗੀ, ਜਿਸ ਨਾਲ ਹੋਟਲ, ਕਿਰਾਏ ਦੇ ਮਕਾਨ, ਅਤੇ ਛੋਟੇ ਕਾਰੋਬਾਰਾਂ ਨੂੰ ਵੀ ਫਾਇਦਾ ਹੋਵੇਗਾ। ਪੰਜਾਬ ਸਰਕਾਰ ਇਸ ਪ੍ਰੋਜੈਕਟ ਲਈ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ 'ਤੇ ਕੰਮ ਕਰ ਰਹੀ ਹੈ।
ਉਦਯੋਗ ਮੰਤਰੀ ਦੀ ਟਿੱਪਣੀ
ਪੰਜਾਬ ਦੇ ਉਦਯੋਗ ਮੰਤਰੀ, ਸੰਜੀਵ ਅਰੋੜਾ ਨੇ ਇਸ ਪ੍ਰਾਪਤੀ 'ਤੇ ਮਾਣ ਜ਼ਾਹਰ ਕਰਦਿਆਂ ਕਿਹਾ, "ਇਹ ਨਿਵੇਸ਼ ਪੰਜਾਬ ਦੇ ਨੌਜਵਾਨਾਂ ਅਤੇ ਆਰਥਿਕਤਾ ਲਈ ਇੱਕ ਇਤਿਹਾਸਿਕ ਤੋਹਫਾ ਹੈ। ਅਸੀਂ ਮਿਲ ਕੇ ਪੰਜਾਬ ਨੂੰ ਨਵੀਂ ਉਚਾਈਆਂ ਤੱਕ ਲੈ ਕੇ ਜਾਵਾਂਗੇ।"
ਇਨਫੋਸਿਸ ਦਾ ਇਹ ਪ੍ਰੋਜੈਕਟ ਨਾ ਸਿਰਫ਼ ਮੋਹਾਲੀ ਨੂੰ ਦਿੱਲੀ ਅਤੇ ਨੋਇਡਾ ਦੇ ਮੁਕਾਬਲੇ ਵਿੱਚ ਲਿਆ ਕੇ ਖੜ੍ਹਾ ਕਰੇਗਾ, ਬਲਕਿ ਪੂਰੇ ਪੰਜਾਬ ਦੀ ਪ੍ਰਗਤੀ ਦੀ ਕਹਾਣੀ ਲਿਖੇਗਾ। ਇਸ ਪ੍ਰੋਜੈਕਟ ਦਾ ਸ਼ੁਭ ਆਰੰਭ 5 ਨਵੰਬਰ 2025 ਨੂੰ ਗੁਰਪੁਰਬ ਦੇ ਸ਼ੁਭ ਮੌਕੇ 'ਤੇ ਹੋਣ ਦੀ ਉਮੀਦ ਹੈ।
