ਮਨੁੱਖੀ ਤਸਕਰੀ ਦਾ ਮਾਮਲਾ ; NIA ਅਦਾਲਤ ਦਾ ਵੱਡਾ ਫੈਸਲਾ : 8 ਬੰਗਲਾਦੇਸ਼ੀਆਂ ਸਮੇਤ 9 ਮੁਲਜ਼ਮਾਂ ਨੂੰ ਉਮਰ ਕੈਦ ਦੀ ਸਜ਼ਾ
ਨਵੀਂ ਦਿੱਲੀ, 18 ਸਤੰਬਰ -: ਹੈਦਰਾਬਾਦ ਵਿੱਚ NIA (ਰਾਸ਼ਟਰੀ ਜਾਂਚ ਏਜੰਸੀ) ਦੇ ਮਾਮਲਿਆਂ ਲਈ ਬਣੀ ਵਿਸ਼ੇਸ਼ ਅਦਾਲਤ ਨੇ 2019 ਦੇ ਮਨੁੱਖੀ ਤਸਕਰੀ ਦੇ ਇੱਕ ਮਾਮਲੇ ਵਿੱਚ ਅੱਠ ਬੰਗਲਾਦੇਸ਼ੀ ਨਾਗਰਿਕਾਂ ਸਮੇਤ ਨੌਂ ਮੁਲਜ਼ਮਾਂ ਨੂੰ ਦੋਸ਼ੀ ਕਰਾਰ ਦਿੰਦਿਆਂ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਇਹ ਮਾਮਲਾ ਬੰਗਲਾਦੇਸ਼ੀ ਔਰਤਾਂ ਦੀ ਭਾਰਤ ਵਿੱਚ ਤਸਕਰੀ ਕਰਨ ਅਤੇ ਬਾਅਦ ਵਿੱਚ ਉਨ੍ਹਾਂ ਨੂੰ ਜਬਰਦਸਤੀ ਵੇਸਵਾ-ਗਮਨੀ (ਜਿਸਮ ਫਰੋਸ਼ੀ) ਦੇ ਧੰਦੇ ਵਿੱਚ ਧੱਕਣ ਨਾਲ ਸਬੰਧਤ ਹੈ।
ਰਾਸ਼ਟਰੀ ਜਾਂਚ ਏਜੰਸੀ (NIA) ਅਨੁਸਾਰ, ਵਿਸ਼ੇਸ਼ ਅਦਾਲਤ ਨੇ 17 ਸਤੰਬਰ ਨੂੰ ਜਾਰੀ ਆਪਣੇ ਹੁਕਮਾਂ ਵਿੱਚ ਦੋਸ਼ੀ ਠਹਿਰਾਏ ਗਏ ਵਿਅਕਤੀਆਂ ‘ਤੇ ਕੁੱਲ 1,37,000 ਰੁਪਏ ਦਾ ਜੁਰਮਾਨਾ ਵੀ ਲਗਾਇਆ ਹੈ। ਉਮਰ ਕੈਦ ਦੀ ਸਜ਼ਾ ਦੇ ਨਾਲ-ਨਾਲ ਵਿਸ਼ੇਸ਼ ਅਦਾਲਤ ਨੇ ਸਾਰੇ ਦੋਸ਼ੀਆਂ ’ਤੇ ਕੁੱਲ 1,37,000 ਰੁਪਏ ਦਾ ਆਰਥਿਕ ਜੁਰਮਾਨਾ ਵੀ ਲਗਾਇਆ ਹੈ। ਅਦਾਲਤ ਨੇ ਆਪਣੇ ਹੁਕਮ ‘ਚ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਜੇਕਰ ਦੋਸ਼ੀ ਜੁਰਮਾਨੇ ਦੀ ਰਕਮ ਅਦਾ ਕਰਨ ‘ਚ ਅਸਫਲ ਰਹਿੰਦੇ ਹਨ ਤਾਂ ਉਨ੍ਹਾਂ ਨੂੰ ਇਸ ਦੇ ਬਦਲੇ 3 ਮਹੀਨੇ ਦੀ ਵਾਧੂ ਸਧਾਰਨ ਕੈਦ ਕੱਟਣੀ ਪਵੇਗੀ।
ਇਹ ਮਾਮਲਾ ਮਨੁੱਖੀ ਤਸਕਰੀ ਦੇ ਇੱਕ ਅਜਿਹੇ ਨੈੱਟਵਰਕ ਨਾਲ ਸਬੰਧਤ ਹੈ ਜੋ ਬੰਗਲਾਦੇਸ਼ੀ ਔਰਤਾਂ ਨੂੰ ਚੰਗੀ ਨੌਕਰੀ ਅਤੇ ਵਧੀਆ ਤਨਖਾਹ ਦਾ ਲਾਲਚ ਦੇ ਕੇ ਭਾਰਤ ਲਿਆਉਂਦਾ ਸੀ ਅਤੇ ਫਿਰ ਉਨ੍ਹਾਂ ਨੂੰ ਜਬਰਦਸਤੀ ਵੇਸਵਾ-ਗਮਨੀ ਦੇ ਧੰਦੇ ਵਿੱਚ ਧੱਕ ਦਿੰਦਾ ਸੀ।
ਇਸ ਮਾਮਲੇ ਨੂੰ ਸ਼ੁਰੂ ਵਿੱਚ ਤੇਲੰਗਾਨਾ ਪੁਲਿਸ ਨੇ ਸਤੰਬਰ 2019 ਵਿੱਚ ਇੱਕ ਕਾਰਵਾਈ ਤੋਂ ਬਾਅਦ ਹੈਦਰਾਬਾਦ ਦੇ ਪਹਾੜੀ ਸ਼ਰੀਫ ਥਾਣੇ ਵਿੱਚ ਦਰਜ ਕੀਤਾ ਸੀ। ਇਸ ਕਾਰਵਾਈ ਦੌਰਾਨ, ਜਲਪੱਲੀ ਪਿੰਡ ਵਿੱਚ ਚੱਲ ਰਹੇ ਇੱਕ ਕੋਠੇ (ਵੇਸਵਾ-ਘਰ) ਵਿੱਚੋਂ ਤਿੰਨ ਬੰਗਲਾਦੇਸ਼ੀ ਔਰਤਾਂ ਨੂੰ ਛੁਡਾਇਆ ਗਿਆ ਸੀ, ਜਦੋਂ ਕਿ ਇੱਕ ਹੋਰ ਔਰਤ ਨੂੰ ਹੈਦਰਾਬਾਦ ਦੇ ਬਾਲਾਪੁਰ ਇਲਾਕੇ ਦੀ ਮਹਿਮੂਦ ਕਲੋਨੀ ਦੇ ਇੱਕ ਘਰ ਵਿੱਚੋਂ ਬਚਾਇਆ ਗਿਆ ਸੀ।
ਇਸ ਤੋਂ ਬਾਅਦ NIA ਨੇ ਜਾਂਚ ਆਪਣੇ ਹੱਥ ਵਿੱਚ ਲੈ ਲਈ ਅਤੇ 12 ਅਕਤੂਬਰ 2019 ਨੂੰ ਇਸ ਮਾਮਲੇ ਨੂੰ RC-03/2019/NIA/HYD ਵਜੋਂ ਦੁਬਾਰਾ ਦਰਜ ਕੀਤਾ।
ਜਾਂਚ ਦੌਰਾਨ, ਤਸਕਰੀ ਦੇ ਇਸ ਨੈੱਟਵਰਕ ਵਿੱਚ ਮੁਲਜ਼ਮਾਂ ਦੀ ਸ਼ਮੂਲੀਅਤ ਸਾਬਤ ਹੋਈ। NIA ਨੇ ਬਾਅਦ ਵਿੱਚ 17 ਅਕਤੂਬਰ, 2020 ਨੂੰ ਭਗੌੜੇ ਮੁਲਜ਼ਮ A1, A3 ਅਤੇ A7 ਸਮੇਤ 12 ਮੁਲਜ਼ਮਾਂ ਖ਼ਿਲਾਫ਼ ਚਾਰਜਸ਼ੀਟ ਦਾਖ਼ਲ ਕੀਤੀ।
ਮੁਲਜ਼ਮਾਂ ਨੂੰ 2019 ਅਤੇ 2020 ਦੌਰਾਨ ਪੱਛਮੀ ਬੰਗਾਲ ਅਤੇ ਤੇਲੰਗਾਨਾ ਸਮੇਤ ਵੱਖ-ਵੱਖ ਥਾਵਾਂ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।
ਅਦਾਲਤ ਵੱਲੋਂ ਸਜ਼ਾ ਸੁਣਾਏ ਗਏ ਮੁਲਜ਼ਮਾਂ ਵਿੱਚ ਰੁਹੁਲ ਅਮੀਨ ਧਾਲੀ (ਏ.2), ਮੁਹੰਮਦ ਯੂਸਫ਼ ਖਾਨ ਉਰਫ਼ ਮੁਹੰਮਦ ਇਮਰਾਨ (ਏ.4), ਬਿਥੀ ਬੇਗਮ ਉਰਫ਼ ਖਦੀਜਾ ਸ਼ੇਕ (ਏ.5), ਇਮਾਮੁਲ ਗਾਜ਼ੀ ਉਰਫ਼ ਮੁਹੰਮਦ ਰਾਣਾ ਹੁਸੈਨ (ਏ6), ਮੁਹੰਮਦ ਅਲ ਮਾਮੂਨ (ਏ.8), ਸੋਜੀਬ ਸ਼ੇਕ (ਏ.9), ਸੁਰੇਸ਼ ਕੁਮਾਰ ਦਾਸ ਉਰਫ਼ ਅਬਦੁੱਲਾ ਅਬਦੁੱਲਾ 10, ਮੁਨਸ਼ੀ ਉਰਫ਼ ਮੁਨਸ਼ੀ (10) (A11) ਅਤੇ ਮੁਹੰਮਦ ਅਯੂਬ ਸ਼ੇਕ (A12)।
ਉਨ੍ਹਾਂ ‘ਤੇ ਭਾਰਤੀ ਦੰਡਾਵਲੀ (ਆਈਪੀਸੀ), ਵਿਦੇਸ਼ੀ ਕਾਨੂੰਨ, 1946, ਅਤੇ ਅਨੈਤਿਕ ਆਵਾਜਾਈ (ਰੋਕੂ) ਐਕਟ, 1956 ਦੀਆਂ ਵੱਖ-ਵੱਖ ਧਾਰਾਵਾਂ ਤਹਿਤ ਮੁਕੱਦਮਾ ਚਲਾਇਆ ਗਿਆ ਸੀ।
