ਹਥਿਆਰਾਂ ਦੀ ਤਸਕਰੀ ਕਰਨ ਵਾਲੇ ਗਿਰੋਹ ਦਾ ਪਰਦਾਫਾਸ਼, ਕੁਲਫੀ ਵੇਚਣ ਦੇ ਬਹਾਨੇ ਲੋਕਾਂ ਨੂੰ ਬਣਾਉਂਦਾ ਸੀ ਮੂਰਖ

ਅੰਮ੍ਰਿਤਸਰ: ਇਸਲਾਮਾਬਾਦ ਥਾਣੇ ਦੀ ਪੁਲਿਸ ਨੇ ਅੰਤਰਰਾਸ਼ਟਰੀ ਪੱਧਰ 'ਤੇ ਨਾਜਾਇਜ਼ ਹਥਿਆਰਾਂ ਦੇ ਕਾਰੋਬਾਰ ਵਿੱਚ ਸ਼ਾਮਲ ਇੱਕ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਹੈ। ਇਸ ਗਿਰੋਹ ਦੇ ਪੰਜ ਮੈਂਬਰਾਂ ਨੂੰ ਗ੍ਰਿਫਤਾਰ ਕਰਕੇ ਉਨ੍ਹਾਂ ਕੋਲੋਂ ਨਾਜਾਇਜ਼ ਹਥਿਆਰ ਬਰਾਮਦ ਕੀਤੇ ਗਏ ਹਨ, ਜੋ ਇਨ੍ਹਾਂ ਨੂੰ ਰਾਜਸਥਾਨ ਤੋਂ ਲਿਆ ਕੇ ਵੱਖ-ਵੱਖ ਥਾਵਾਂ 'ਤੇ ਸਪਲਾਈ ਕਰਦੇ ਸਨ। ਮੁਲਜ਼ਮਾਂ ਦੇ ਕਬਜ਼ੇ ਤੋਂ ਤਿੰਨ ਪਿਸਤੌਲ ਅਤੇ 30 ਬੰਦੂਕਾਂ ਬਰਾਮਦ ਕੀਤੀਆਂ ਗਈਆਂ ਹਨ। ਗ੍ਰਿਫਤਾਰ ਕੀਤੇ ਗਏ ਪੰਜ ਮੁਲਜ਼ਮਾਂ ਦੀ ਪਛਾਣ ਮੁਹੰਮਦ ਅਕਬਰ (32) ਵਾਸੀ ਗਲੀ ਨੰਬਰ 5 ਕੋਟ ਖਾਲਸਾ, ਜਾਵੇਦ ਖਾਨ (36) ਵਾਸੀ ਗਲੀ ਨੰਬਰ 5 ਗੁਰੂ ਨਾਨਕ ਪੁਰਾ ਪੁਤਲੀਘਰ, ਕਾਸਿਮ (27) ਵਾਸੀ ਸਰਕਾਰ ਪੱਤੀ ਕੋਟ ਖਾਲਸਾ, ਮੁਕੇਸ਼ ਕੁਮਾਰ ਉਰਫ ਮੱਖੂ (26) ਵਾਸੀ ਪਿੰਡ ਖੋਖਰਾਵਾਲੀ, ਸ੍ਰੀ ਗੰਗਾਨਗਰ ਰਾਜਸਥਾਨ ਅਤੇ ਆਲਮੀਨ ਅੰਸਾਰੀ (32) ਵਾਸੀ ਦਸਮੇਸ਼ ਨਗਰ ਕੋਟ ਖਾਲਸਾ ਵਜੋਂ ਹੋਈ ਹੈ। ਇਹ ਸਾਰੇ ਮੁਲਜ਼ਮ ਕੁਲਫੀ ਵੇਚਦੇ ਸਨ

ਇਸ ਸਬੰਧੀ ਡੀਸੀਪੀ ਵਿਜੇ ਆਲਮ  ਅਤੇ ਏਡੀਸੀਪੀ-1 ਨੇ ਦੱਸਿਆ ਕਿ ਪੁਲਿਸ ਪਾਰਟੀ ਨੇ ਪਹਿਲਾਂ ਮੁਹੰਮਦ ਅਕਬਰ ਪੁੱਤਰ ਮੁਹੰਮਦ ਫਾਰੂਕ ਵਾਸੀ ਕੋਟ ਖਾਲਸਾ ਅੰਮ੍ਰਿਤਸਰ, ਜਾਵੇਦ ਖਾਨ ਵਾਸੀ ਪੁਤਲੀਘਰ, ਉਸਮਾਨ ਗਨੀ ਵਾਸੀ ਗੁਰੂ ਨਾਨਕ ਪੁਰਾ ਅਤੇ ਕਾਸਿਮ ਪੁੱਤਰ ਇਕਬਾਲ ਵਾਸੀ ਸਰਕਾਰ ਪੱਤੀ ਕੋਟ ਖਾਲਸਾ ਅੰਮ੍ਰਿਤਸਰ ਨੂੰ ਗ੍ਰਿਫਤਾਰ ਕੀਤਾ।

ਅਧਿਕਾਰੀਆਂ ਨੇ ਦੱਸਿਆ ਕਿ ਦੋਸ਼ੀ ਮੁਹੰਮਦ ਅਕਬਰ ਲੋਕਾਂ ਨੂੰ ਧੋਖਾ ਦੇਣ ਲਈ ਕੁਲਫੀ ਵੇਚਦਾ ਸੀ। ਉਥੇ ਹੀ ਦੋਸ਼ੀ ਜਾਵੇਦ ਖਾਨ ਪੁਤਲੀਘਰ ਬਾਜ਼ਾਰ 'ਚ ਸਥਿਤ ਸ਼ਿਮਲਾ ਬਾਜ਼ਾਰ 'ਚ ਕੰਮ ਕਰਦਾ ਹੈ। ਦੋਸ਼ੀ ਕਾਸਿਮ ਵਿਆਹ ਦੇ ਸੀਜ਼ਨ ਦੌਰਾਨ ਕੁਲਫੀ ਵੇਚਦਾ ਸੀ। ਇਸੇ ਤਰ੍ਹਾਂ ਰਾਜਸਥਾਨ ਦਾ ਰਹਿਣ ਵਾਲਾ ਮੁਕੇਸ਼ ਕੁਮਾਰ ਘਰਾਂ ਨੂੰ ਰੰਗਦਾ ਸੀ ਅਤੇ ਦੋਸ਼ੀ ਆਲਮੀਨ ਅੰਸਾਰੀ ਵੀ ਚਾਪ ਵੇਚਦਾ ਸੀ। ਇਸ ਤਰ੍ਹਾਂ ਸਾਰੇ ਦੋਸ਼ੀ ਇਸ ਤਰ੍ਹਾਂ ਕੰਮ ਕਰਦੇ ਸਨ ਕਿ ਲੋਕਾਂ ਨੂੰ ਉਨ੍ਹਾਂ 'ਤੇ ਕਿਸੇ ਤਰ੍ਹਾਂ ਦਾ ਸ਼ੱਕ ਨਾ ਹੋਵੇ। ਕਿਸੇ ਨੂੰ ਇਸ 'ਤੇ ਸ਼ੱਕ ਨਹੀਂ ਸੀ, ਪਰ ਇਹ ਸਾਰੇ ਵੱਡੇ ਪੱਧਰ 'ਤੇ ਨਾਜਾਇਜ਼ ਹਥਿਆਰਾਂ ਦਾ ਕਾਰੋਬਾਰ ਕਰਦੇ ਸਨ।